दार्चुला।महाकाली नदीमा हाम फालेर एक महिलाले आत्महत्या गरेकी छन्। दार्चुलाको महाकाली नगरपालिका ४ स्थित घाटबजार रोशन वियर बारमा काम गर्ने अन्दाजी २६ वर्षीया दमन्ती धामीले नदीमा हाम फालेकी हुन्।
आइतबार बिहान रिङनतालको सिंढीबाट उनले महाकाली नदीमा हाम फालेको प्रहरीले जनाएको छ। सोही स्थानमा आवतजावत गर्ने मानिसहरूले देखेपछि प्रहरीलाई खबर गरेका थिए।
त्यसलगत्तै नेपाल प्रहरी र सशस्त्र प्रहरीको टोलीले करिब २ किलोमिटर तल वडा नम्बर ५ नमस्कार मन्दिर नजिक महाकाली नदी किनारमा उनको शव फेला पारेको जिल्ला प्रहरी कार्यालय दार्चुलाले जनाएको हो।उनको शव जिल्ला अस्पताल दार्चुलामा राखिएको बताइएको छ।@RSS
