काठमाडौं । कानुन व्यवसायीहरुको छाता संगठन नेपाल बार एसोसिएसनको नयाँ नेतृत्व चयनका लागि मतदान सुरु भएको छ। नयाँ नेतृत्व चयनका लागि शनिबार बिहान आठ बजेदेखि मतदान सुरु भएको निर्वाचन समितिले जनाएको छ।
देशभरका ३५ स्थानबाट हुन लागेको मतदान अपराह्न ४ बजे सम्पन्न हुने बताइएको छ। प्रगतिशील तथा पेसागत कानुन व्यवसायी समूह र बृहत् लोकतान्त्रिक प्रगतिशील समावेशी तथा पेसागत कानुन व्यवसायी समूहबीच प्रतिस्पर्धा हुने भएको छ।
बृहत् लोकतान्त्रिक प्रगतिशील समावेशी तथा पेसागत कानुन व्यवसायी समूहको नेतृत्व गोपालकृष्ण घिमिरे र प्रगतिशील तथा पेशागत कानुन व्यवसायी समूहको तर्फबाट वरिष्ठ अधिवक्ता विष्णुमणि अधिकारीको समूहविच प्रतिष्पर्धा हुँदैछ।
बारमा अध्यक्षसहित ११ पदाधिकारी र १३ सदस्य गरी २५ जनाको कार्यसमितिका लागि निर्वाचन हुनेछ। निर्वाचनमा नौ हजार ७०८ अधिवक्ता मतदाता रहेका छन्।
