काठमाडौं । बिहीबार काठमाडौंमा दुई फरक समूहले गरेका कार्यक्रममा १६ हजारभन्दा बढी प्रदर्शनकारी सहभागी भएको सुरक्षा निकायले आंकलन गरेको छ । सुरक्षा निकाय स्रोतका अनुसार बल्खुमा आयोजित दुर्गा प्रसाईको कार्यक्रममा ९ हजारभन्दा बढी प्रदर्शनकारी सहभागी थिए ।
यस्तै महेश बस्नेतको कार्यक्रममा ७ हजारभन्दा बढी सहभागी भएको एक उच्च प्रहरी अधिकृतले बताए । कार्यक्रमको सुरक्षा व्यवस्थापनका लागि जिल्लास्तर र काठमाडौं उपत्यकास्तरमा संयुक्त कमान्ड सेन्टर बनाइएको थियो ।
एमालेका युवा विद्यार्थीहरुको प्रदर्शन शान्तिपूर्ण र व्यवस्थित देखिएको थियो भने दुर्गा प्रसाईको प्रदर्शन नेतृत्वविहीन अराजक देखिएको प्रहरी अधिकारीहरुले बताएका छन् । कसैको पनि कमाण्ड नहुँदा तोडफोड र ढुंगामुढामा प्रदर्शनकारी उत्रिएका थिए । त्यसक्रममा बाध्य भएर बल प्रयोग गर्नु परेको र अश्रु ग्याँस प्रहार गरेर भीड तितरवितर नपारेको भए सार्वजनिक र व्यक्तिका सम्पत्तिमा थप क्षति हुने काठमाडौं प्रहरी प्रमुख भुपेन्द्र खत्रीले बताएका छन् ।
एमालेका युवा विद्यार्थीको प्रदर्शनमा भने विभिन्न जनवर्गीय संगठन र पार्टीका सम्पर्क मन्चहरुले आ आफ्नो कमिटीमा आबद्ध कार्यकर्ताको हाजिरीसहित व्यवस्थित गरेकाले कसैले पनि कमाण्डबाहिर गएर अवान्छित गतिविधि गर्न पाएनन् । युवा संघको प्रदर्शनमा १० हजारजतिको संख्यामा सहभागी भए पनि भाषण शुरु हुँदा ठूलै संख्या हाजिरी जनाएर बाहिरिइसकेको थियो ।
एक अधिकारीले भने–हामीले ३० हजार प्लस मान्छे दुर्गा प्रसाईकोमा आउन सक्ने अनुमान गरेका थियौं तर ९ हजारजति आए । युवा संघको हामीले अपेक्षा गरेजस्तै प्रदर्शन भयो ।
बल्खुमा प्रसाई समूहका प्रदर्शनकारी कालिमाटी प्रवेश गर्न खोजेपछि प्रहरीले १४६ राउन्ड अश्रुग्यास प्रहार गरेको थियो । त्यसक्रममा ५ राउन्ड रबरका गोली पनि प्रहार भएको बुझिएको छ । झडपका क्रममा प्रदर्शनकारीतर्फ ६ जना र प्रहरीतर्फ २ जना घाइते भएका छन् । उनिहरुको अवस्था सामान्य रहेको बुझिएको छ । तीनकुनेमा हुने कार्यक्रममा सहभागी हुन स्वयंम्भुबाट आएका युवा संघका कार्यकर्ता र प्रसाई समूहका कार्यकर्ताबीच दिउँसो बल्खुमा झडप भएको थियो ।
युवा संघका कार्यकर्तालाई तीनकुने पुर्याउिने रुट मिलाउनेक्रममा त्रुटी हुँदा उक्त झडपको स्थिती आएको एक अधिकृतले बताए । ‘युवा संघका कार्यकर्तालाई कलङ्कीबाट कालिमाटी भएर बल्खु हुँदै तीनकुने लैजान खोज्दा त्यहाँ समस्या भएको हो। अन्यथा दुई समूहबीच कुनै तनाव देखिएन’, ती अधिकारीले भने ।
दुर्गा प्रसाईको कार्यक्रममा काठमाडौं बाहिरबाट करिब ५ हजारको संख्यामा प्रदर्शनकारी काठमाडौं आएको सुरक्षा निकायको अनुमान छ ।
