एजेन्सी ।तालिबान सरकारले अफगानिस्तानको आन्तरिक मामिलामा हस्तक्षेप नगर्न अमेरिकालाई चेतावनी दिएको छ।तालिबान सरकारका विदेशी राजनीतिक मामिला उपमन्त्री शेर मोहम्मद अब्बास स्टानिकजईले अफगानिस्तानको आन्तरिक मामिलामा अमेरिकाले हस्तक्षेप गर्न नहुने बताएका छन्। अब आफूहरु स्वतन्त्र देश रहेको र स्वतन्त्र रुपमा निर्णय लिइरहेको उनले बताएका छन्।
उपमन्त्री स्टानिकजईले भने, ‘चार दशकमा पहिलोपटक हाम्रो देश स्वतन्त्र भएको छ। पछिल्लो चार महिनामा अफगानिस्तानले स्वतन्त्र रुपमा आफ्नो फैसला लिइरहेको छ।’उनले चेतावनीको भाषामा भनेका छन्, ‘दुश्मनहरुले यो नसोचून् कि ४० वर्षको युद्धले अफगानिस्तान कमजोर भएको छ, आवश्यक परेमा आउँदो ४० वर्षसम्म लड्ने क्षमता छ।’
उपमन्त्री स्टानिकजईले आर्थिक समस्याका कारण दैनिक रुपमा सयौँ अफगानी देश छोडेर इरान गइरहेको पनि स्वीकार गरेका छन्। तर धेरैले सीमा पार गर्न नपाएको वा मृत्यु भएको पनि उनले स्वीकार गरेका छन्।
उनले छिमेकी देशसँग सहयोगका लागि अपिल गरेका छन्। अफगान शरणार्थीका लागि सीमा खोल्न र भिसा नियम खुकुलो बनाउन पनि उनले आग्रह गरेका छन्।उनले महिलाहरुलाई जागिर गर्ने तथा छात्राहरुलाई अध्ययनको अवसर रहेको दाबी गरे, तर अफगानिस्तानको संस्कृति पश्चिमी देशको भन्दा फरक रहेको पनि उनले औंल्याए।
तालिबानले सत्ता हत्याएसँगै महिलामाथि कडा नियम लागु गरेको छ। हालैमात्र उसले मध्यम तथा लामो दूरीको यात्रा गर्दा अनिवार्य रुपमा परिवारका पुरुष सदस्य साथमा हुनुपर्ने नियम लागु गरेको छ।
