घरेलु हिंसामा परेको भन्दै ४० पुरुषले दिए उजुरी

कर्णाली अनलाइन २६ मंसिर २०८०, मंगलवार १०:१७

बाँके। पुरुष पनि घरेलु हिंसामा परेको जनाउँदै न्यायका लागि प्रहरी कार्यालयमा उजुरी दिन पुगेका छन्। चालु आर्थिक वर्षको साउनदेखि हालसम्म ४० जना पुरुषले न्यायका लागि उजुरी दिएको जिल्ला प्रहरी कार्यालय, महिला बालबालिका तथा ज्येष्ठ नागरिक सेवा केन्द्र प्रमुख प्रहरी निरीक्षक महेश्वरी विष्टले जानकारी दिए।

उनका अनुसार पुरुषको तर्फबाट पनि हिंसामा परेको उजुरी आइरहेका छन्। तर पुरुषले दिने उजुरीको तुलनामा महिलाको सङ्ख्या अत्यधिक छ।

‘अधिकांश हिंसामा परेको उजुरी महिलाको तर्फबाट आउने गरेका छन्’, प्रहरी निरीक्षक विष्टले भने, ‘कतिपय अवस्थामा पुरुषको तर्फबाट पनि उजुरी आइरहेका छन्, हामीले आवश्यक कारबाही गरिरहेका छाैं।’

जिल्ला प्रहरी कार्यालय, बाँकेको तथ्यांकअनुसार बाँकेमा पछिल्लो तीन वर्षमा घरेलु हिंसाका दुई हजार सात सय ५० वटा उजुरी दर्ता भएका छन्। अधिकांश घटनामा महिला पीडित रहेका छन्। अहिले पुरुषले समेत आफूमाथि हिंसा भएको भन्दै उजुरी दिन थालेका छन्।

जिल्ला प्रहरी कार्यालय बाँकेमा आव २०७७/७८ मा सात सय ३८, २०७८/७९ मा आठ सय ८९, २०७९/८० मा आठ सय ८५ र चालु आवको साउनदेखि हालसम्म घरेलु हिंसामा परेको जनाउँदै तीन सय ३२ वटा उजुरी परेका छन्।

जिल्ला प्रहरी कार्यालय, बाँकेका प्रवक्ता प्रहरी नायब उपरीक्षक नारायण डाँगीले हिंसामा परेको भन्दै उजुरी दिने महिलामा बयान फिर्ता गरी उजुरी फिर्ता हुने प्रवृत्ति पनि देखिएको बताए।

‘निवेदन दिइसकेपछि कतिपय निवेदनकर्ता सम्पर्कमा आउँदैनन्। प्रतिशोध साँध्नका लागि उजुरी दिने र त्यसपछि वास्तै नगर्ने प्रवृत्तिसमेत बढ्दै गएको छ’, उनले भने, ‘उजुरी परेपछि हिंसासँग जोडिएका घटनालाई सुक्ष्मरूपले गम्भीरतापूर्वक अनुसन्धान गर्ने गरिएको छ।’ रासस


Leave a Reply

Your email address will not be published. Required fields are marked *

Next Post

रुकुम पश्चिममा ट्र्याक्टर दुर्घटना हुँदा ५ जनाको मृत्यु,९ जना घाइते

२६ मंसिर २०८०, मंगलवार १०:१७
सुर्खेत । रुकुम पश्चिममा ट्र्याक्टर दुर्घटना हुँदा ५ जनाको मृत्यु भएको। दुर्घटनामा ९ जना घाइते भएका छन्। भूकम्प प्रभावितका लागि अस्थायी टहरा बनाउन जस्तापाता बोकेको ट्र्याक्टर दुर्घटनामा परेको प्रहरीले जानकारी दिएको छ। आठबीसकोट नगरपालिका–१० पिरीकोटबाट आठबीसकोट–८ घर्तीगाउँ जाँदै गरेको रा १ त १४ नम्बरको ट्र्याक्टर बुधबार राति दुर्घटना भएको हो। दुर्घटनामा […]