मोरङ।प्रेमीको सहयोगमा आफ्नै श्रीमानको हत्या गरेकी महिलालाई जिल्ला अदालत मोरङले जन्मकैदको फैसला सुनाएको छ।विराटनगरका व्यवसायी ३३ वर्षीय देवीप्रसाद दुलालको हत्यामा सम्लग्नलाई जन्मकैदको सजाय सुनाइएको छ । विराटनगर महानगरपालिका–१० मधुमारामा औषधि व्यवसायी दुलालको हत्यामा सम्लग्न आफ्नै श्रीमतीसहित २ जनालाई जिल्ला अदालत मोरङले जन्मकैद फैसला सुनाएको हो ।
सुनसरीको इटहरी उपमहानगरपालिका–१२ खनार घर भएका दुलालको सुतेकै ठाउँमा २०७७ साल जेठ ४ गते राति हत्या भएको थियो । उनले मधुमारामा घर भाडामा लिएर देवी माँ पाथीभरा फर्मा नाम दिएर औषधिको डिलर सञ्चालन गर्दै आएका थिए ।
अदालतका सूचना अधिकारी हेमबहादुर बुढाथोकीका अनुसार न्यायाधीश मनोज केसीको इजलासले घटनामा संलग्न ३३ वर्षीया श्रीमती मीना श्रेष्ठ दुलाल र उनकी प्रेमी सिरहा लाहानका २१ वर्षीय ब्रह्मदेव साहलाई जन्मकैदको सजाय सुनाएको हो।
यससँगै दुवै जनालाई विराटनगर कारागार चलान गरिएको छ। सो घटनामा मतियारका रुपमा मुद्दा चलाइएका सुनसरीका २० वर्षीय सोनुकुमार साहको सजाय भने निर्धारण हुन बाँकी रहेको उनले जानकारी दिए।
