दैलेख।आफूमाथि बलात्कार भएको भनेर प्रहरीमा दिएको जाहेरी भन्दा फरक बयान दिएपछि जिल्ला अदालत दैलेखले एकजना महिलालाई तीन महिना जेल सजाय सुनाएको छ। जिल्ला अदालत दैलेखका सूचना अधिकारी टीकाराम न्यौपानेका अनुसार न्यायाधीश दण्डपाणि लामिछानेको इजलासले ती २२ वर्षीया महिलालाई तीन महिना जेल र ४ हजार जरिवाना तोकेको हो।
बलात्कार मुद्दामा अदालतमा बयान फेरेको ठहरसहित ती महिलालाई जेल सजाय र जरिवाना सुनाइएको न्यौपानेले बताएका छन्। ‘राज्यका श्रोत, साधन र जनशक्तिलाई अनुत्पादक काममा खर्च गराउने काम भयो’, अदालतले फैसलामा भनेको छ, ‘पीडित भनिएकी महिलाले बयान फेर्नु कानुनको उलंघन हो।’
अदालतले बलात्कार मुद्दा चलाइएका जिल्लाकै भगवतीमाई गाउँपालिका वडा नम्बर ५ का २३ वर्षीय दीपेन्द्र चन्दलाई सफाइ दिएको छ। उनी बलात्कार मुद्दामा चार महिनादेखि दैलेख कारागारमा थिए।
यसअघि अछाम जिल्ला अदालतले बलात्कार मुद्दामै बयान फेरेपछि साढे तीन वर्ष जेल सजाय सुनाइएको छ। उनले सहमतिमै यौनसम्बन्ध राखेर पनि बलात्कार आरोप लगाएको ठहर अदालतले गरेको थियो।
