काठमाडौँ।प्रधानमन्त्री शेरबहादुर देउवा भारतको तीन दिने औपचारिक भ्रमण पूरा गरी स्वदेश फर्किएका छन्। प्रधानमन्त्री देउवा नेपाल एयरलाइन्सको विमानबाट आइतबार साँझ स्वदेश फर्किएका हुन्।
उनलाई विमानस्थलमा कार्यवहाक प्रधानमन्त्री बालकृष्ण खाँण, सभामुख अग्नीप्रसाद सापकोटासहित नेपाल सरकारका उच्च पदस्थ कर्मचारीहरुले विमानस्थलमा स्वागत गरेका थिए। त्यस अवसरमा नेपाली सेनाले उनलाई सलामी अर्पण गरेको थियो।
गत शुक्रबार नेपाली प्रतिनिधिमण्डलको नेतृत्व गर्दै प्रधानमन्त्री देउवा भारत भ्रमणमा गएका थिए। भ्रमणका क्रममा उनले भारतीय समकक्षी नरेन्द्र मोदी, विदेशमन्त्री एस जयशंकरलगायतसँग द्विपक्षीय हितका विविध विषयमा छलफल गरेका थिए।
त्यसै क्रममा प्रधानमन्त्री देउवा र भारतीय समकक्षी मोदीले जनकपुर–जयनगर रेल सेवाको भर्चुअल उद्घाटनसमेत गरेका थिए। प्रधानमन्त्री देउवा आज बिहान धार्मिक नगरी वाराणसी पनि पुगेका थिए।
