सुर्खेत । सुर्खेत उद्योग वाणिज्य संघको अध्यक्षमा विजयी भएका लक्ष्मण कँडेलकाे समूहले विजयी र्याली निकालेकाे छ । कँडेलले सत्ता गठबन्धन दल र राप्रपाबाट अध्यक्षका उम्मेद्वार बनेका हर्षविक्रम खड्कालाई ४८ मतान्तरले हराउँदै विजयी भएपछि कँडेलकाे समूहले आज वीरेन्द्रनगरमा विजयी र्याली निकालेका हुन् ।
कँडेलले ९११ मत ल्याएर विजयी हुँदा उनका प्रतिद्वन्द्वी हर्षविक्रम खड्काले ८६३ मत ल्याएका छन् । संघको १३ औं कार्यसमितिको नेतृत्व छान्नका लागि आइतबार भएको मतदानमा संघको नेतृत्वका लागि नेपाली कांग्रेसभित्रै दुई प्यानल चुनावी मैदानमा होमिएका थिए । खड्कालाई सत्तागठबन्धनले समर्थन गरेको थियो भने कँडेललाई कांग्रेसका नेता शेखर कोइराला र नेकपा एमाले निकट व्यवसायीहरूले सहयोग गरेका थिए ।
नेपालीरैबारलाई संक्षित प्रतिक्रिया दिँदै निर्वाचित कँडेलले व्यवसायी साझा थलाेकाे रुपमा संघकाे नयाँ नेतृत्वमा विजयी गराउनु हुनु सबै मतदातालाई धन्यवाद ज्ञापन गरेका छन् । उनले व्यवसायीक हकहितमा सदैव प्रतिवद्ध रहने बताए ।
कर्णालीमा लगानी भित्र्याउन सरकारसँग संघले पुलकाे काम गर्ने बताए । उनले आफ्नाे कार्यकालमा नीजि क्षेत्रलाई अब्बल बनाउँन सबै पक्षसँग समन्वय गरेर अघि बढ्ने प्रतिवद्धता समेत जनाएका छन् । कँडेल यसअघि संघकाे निवर्तमान महासचिव थिए ।
