बाँके– बाँके राष्ट्रिय निकुञ्जमा चार वर्षमा चारवटा बाघ बढेको छ।पछिल्लो पटक गरिएको गणनाको रिपोर्ट अनुसार, बाँकेमा बाघको संख्या २५ पुगेको छ। सन् २०१८ मा बाँकेमा २१ वटा बाघ थिए। सन् २०१३ मा चारवटा बाघ थिए।
बाघ संरक्षण गर्ने उद्देश्यले स्थापना गरिएको बाँके राष्ट्रिय निकुञ्जमा आशातित बाघको संख्या बढ्न सकेन। बर्दियामा भने ३८ वटा बाघ बढेकाे छ। बाँके र बर्दिया निकुञ्ज जोडिएकाले बाघ दुवैतिर देखिएको हुन सक्ने बाँकेका वार्डेन श्यामकुमार शाहले बताए।
‘जंगल एउटै भयो। बाघ दुवैतिर देखिएर बर्दियातिर गणना भएको हुन सक्छ’, वार्डेन शाहले भने, ‘प्रतिवेदन हेर्न पाएको छैन। त्यो हेरेपछि वास्तविकता थाहा हुन्छ।’
२०६७ सालमा बाँके राष्ट्रि निकुञ्ज स्थापना गरिएको हो। बाघलाई नै फोकस गरेर स्थापना गरिएको निकुञ्जमै पछिल्लो गणनामा बाघ बढेको देखिएन।
निकुञ्ज अधिकारीहरू बाँकेमा बाघका लागि राम्रो बासस्थान, आहारा प्रजाति प्रशस्त रहेको बताउँछन्।
बाँके राष्ट्रिय निकुञ्ज र आसपासमा बाघले आधा दर्जन बढी मानिसलाई आक्रमण गरेको तथ्यांकले निकुञ्जमा बाघको संख्या धेरै बढेको आंकलन गरिएको थियो।
