बाँके। नेपालगञ्जमा बम विस्फोट भएको छ । नेपालगञ्ज उपमहानगरपालिका वडा नम्बर १०, भृकुटीनगरस्थित डिल्ली क्षेत्रीको कोठामा बम विस्फोट भएको हो ।
नेत्रविक्रम चन्द नेतृत्वको नेकपा निकट अखिल क्रान्तिकारी बाँकेका जिल्ला अध्यक्ष क्षेत्रीको कोठामा बम बनाउने क्रममा विस्फोट भएको जनाइएको छ । प्रेसर कुकर वम बिस्फोट हुँदा क्षेत्री र धर्म बडुवाल घाइते भएका छन् ।
बडुवालको अवस्था गम्भीर रहेको छ । घाइते दुवैलाई भेरी अस्पतालमा ल्याइएकोमा केहीबेरको उपचारपछि बडुवाललाई नेपालगञ्ज मेडिकल कलेज लैजाने तयारी भएको छ ।
विप्लव नेकपाले चुनाव बहिष्कारको नीति लिएको छ । चुनावको बेलामा तर्साउनका लागि बम बनाउने क्रममा विस्फोट भएको प्रहरीले आशंका गरेको छ ।
