काठमाडौँ।माओवादी केन्द्रका अध्यक्ष पुष्पकमल दाहाल प्रचण्डले एकीकृत समाजवादीसँग समेत चुनावी तालमेल असहज भएको ब्रिफिङ गरेका छन्।पाँच दलीय गठबन्धनले केन्द्रमा गरेको निर्णय जिल्ला तथा स्थानीय तहमा कार्यान्वयन गर्न आनाकानी भइरहेका बेला दाहालले सबै ठाउँमा गठबन्धन हुने संभावना नरहेको बताएका हुन्।
चुनावी समीक्षाका लागि नेताहरुसँगको बैठकमा दाहालले सबै दलले बलियो गरी दाबेदारी प्रस्तुत गरिरहेको ब्रिफिङ गरेका हुन्। जसका कारण तालमेल मिलाउन कठिन भइरहेका उनको भनाइ थियो।
बैठकमा दाहालले एकीकृत समाजवादीसँग चुनावी तालमेल सहज हुने अपेक्षा गरे पनि सामथ्र्यभन्दा बढी खोजेको आरोप लगाए।दाहालको भनाइ उद्धृत गर्दै एक नेताले भने, ‘सबै दलसँग चुनावी गठबन्धन गाह्रो छ। माधव नेपालसँग अलिक सजिलो होला कि भनेको त, उहाँसँग पनि सजिलो नभएकै रिपोर्ट छ। नेपाली कांग्रेससँग त गाह्रो छँदै छ। चुनावमा सबैले आफ्नो आफ्नो बलियो दाबेदारी प्रस्तुत गरिरहेका छन्।’
