धनकुटा।धनकुटाको छथर जोरपाटी गाउँपालिका वडा नं ६ सिधुवा बजारमा आगलागी भइरहेको छ।आगलागी शुक्रबार बेलुका शुरु भएको थियो। आगो निभाउन स्थानीय लागिपरेका छन्। आगलागी नियन्त्रण बाहिर रहेको र धनकुटा नगरपालिकाका साथै लालीगुराँश नगरपालिकाका दमकल मगाइएको छथर जोरपाटी वडा नं ६ का अध्यक्ष दिपक गुरुङले बताए। उनले दमकल आउँदै गरेको जानकारी पाएको बताए।
आगलागीबाट ३ घर जलेर पूरै क्षति भएको र बजारका अन्य घर जोखिममा रहेको उनले बताए। बस्तीको बीचमा आगलागी भएकाले आगो फैलिन नदिने गरी नियन्त्रणमा लिने प्रयास भइरहेको भए पनि ग्यास सिलिन्डर पड्केका कारण समस्या भएको उनले बताए।
दमकल आएपछि मात्रै आगलागी नियन्त्रण गर्न सकिन्छ कि भनेर आशा गर्नुबाहेक अरु उपाय नरहेको उनले बताए। आगलागीको कारण खुल्न सकेको छैन।
