काठमाडौँ ।प्रधानन्यायाधीशले राजीनामा दिनुपर्ने अडानमा सर्वोच्च न्यायाधीशहरु कायम रहेका छन् । मंगलबार प्रधानन्यायाधीशलाई भेटेपछि फेरि सामूहिक छलफलमा जुटेका न्यायाधीशहरुले आफूहरुको अडान कायम रहेको बताएका छन्।
न्यायाधीशहरुको सामूहिक छलफलमा भएको कुराकानीबारे स्रोतले भन्यो, ‘न्यायाधीशहरु वर्तमान नेतृत्वले न्यायपालिकाको नेतृत्व गर्न नसक्नेमा अडिग छन्। राजीनामाको मागमा न्यायाधीशहरुको अडान यथावत छ।’
न्यायाधीशहरु बुधबार पुनः सामूहिक छलफलमा जुट्ने छन् । छलफल बुधबार बिहान ११ बजे हुनेछ ।यसअघि प्रधानन्यायाधीश चोलेन्द्र शमशेर जबराले सहकर्मी न्यायाधीशहरुसँग आफूले राजीनामा नदिने स्पष्ट पारेका थिए ।
अघोषित रुपमा इजलास बहिष्कार गरेर सामूहिक छलफलमा जुटेका सर्वोच्चका न्यायाधीशहरुले मंगलबार प्रधानन्यायाधीश राणालाई भेटेर राजीनामा दिन आग्रह गरेका थिए ।
तर जवाफमा प्रधानन्यायाधीश राणाले सडकबाट राजीनामा माग्दैमा आफूले पद नछोड्ने स्पष्ट पारे । स्रोतले भन्यो, ‘न्यायाधीशहरुले तपाईँका विषयमा धेरै प्रश्न आयो, विवाद झन फैलिने भयो, राजीनामा दिनुस् भन्नुभयो । जवाफमा प्रधानन्यायाधीशले सडकबाट राजीनामाको माग आउँदैमा आफूले नदिने बताउनु भयो ।’
प्रधानन्यायाधीश राणाले ‘तपाईँहरुले गरेका आदेश–फैसलालाई लिएर पनि विवाद भएको छ । सो विवादित फैसलामा सामेल तपाईँहरुले पनि राजीनामा दिने भए म पनि दिन्छु । होइन भने सडकबाट मागे भन्दै मैले राजीनामा दिन्नँ’ भनेको स्रोतले देश सञ्चारलाई जानकारी दिएको छ ।
प्रधानन्यायाधीश राणाले आफ्नो संवैधानिक जिम्मेवारी रहेको र सो जिम्मेवारी पूरा गर्ने, राजीनामा नदिने जवाफ दिएपछि सर्वोच्चका न्यायाधीशहरु फेरि सामूहिक छलफलमा जुटेका थिए । त्यसले गर्दा मंगलबार पनि इजलास प्रभावित भएको छ ।
प्रधानन्यायाधीश राणामाथि न्यायिक विचलन, राजनीतिक भागबण्डा तथा भ्रष्टाचारमा संलग्न भएको आरोप छ ।
