काठमाडौँ ।काठमाडौँको सानोभर्याङस्थित नेपाली सेनाको स्वास्थ्य विज्ञान संस्थानमा एमबीबीएस चौथो वर्षमा अध्ययनरत एक विद्यार्थी दुई महिनादेखि सम्पर्कविहीन छन्। दैलेखको गुराँस गाउँपालिका–२ बस्ने दानबहादुर शाहीका छोरा २४ वर्षीय राजेश शाही लामो समयदेखि बेपत्ता रहेका हुन्। उनी बेपत्ता भएको घटनाको खास कारण खुल्न सकेको छैन।
काठमाडौँ महानगरीय प्रहरी परिसरका प्रवक्ता प्रहरी उपरीक्षक रमेशकुमार बस्नेतले शाही बेपत्ता भएको भनी प्रहरीमा निवेदन परेलगत्तै खोजी सुरु गरिए पनि अहिलेसम्म अवस्था पत्ता नलागेको जानकारी दिए। ‘कलेजबाट निस्केर गएको भन्ने छ, हामी खोज्दै छौँ’, बस्नेतले भने, ‘कारण पत्ता लागिसकेको छैन।’
उनको परिवारले भने संस्थानको छात्रावासबाटै शाही हराएको जिकिर गर्दै सेनाले सत्यतथ्य जानकारी दिनुपर्ने माग गरेका छन्। शाहीका फुपूका छोरा (नाताले दाइ) पदम मल्लले भदौ १७ गते कलेजबाटै बेपत्ता भएको जनाउँदै उनको अवस्था छिटो सार्वजनिक गर्न माग गरे।
भदौ १७ मा हराएका उनका बारे २१ गतेमात्रै सेनाले परिवारलाई खबर गरेकाले त्यसप्रति आशङ्का उब्जिएको उनले बताए। खबर पाउनेबित्तिकै काठमाडौँ आएर नेपाली सेना र महानगरीय प्रहरी परिसरमा खोजतलासका लागि निवेदन दिए पनि अहिलेसम्म कुनै जानकारी आउन नसकेको मल्लको गुनासो थियो।
‘आज ५९औँ दिन भयो हराएको अहिलेसम्म अवस्था के छ कसैलाई पत्तो छैन, भइरहेको अनुसन्धान प्रक्रिया पनि चित्तबुझ्दो छैन’, उनले भने, ‘बाध्य भएर मिडियामा आउनुपरेको छ।’
मल्लले आफ्नो विद्यार्थीको निगरानी गर्नुपर्ने जिम्मेवारी रहेको संस्थानले ध्यान नदिँदा शाहीको अवस्था अज्ञात बन्न पुगेको बताए। ‘शाही असल विद्यार्थी हुन्, गलत भए पनि कानुनी उपचारको बाटो अलग्गै हुन्छ, हामीलाई मान्छे चाहियो’, उनले जोड दिएर भने।
शाहीका साथीहरुले तपाईहरु छिटो आएर राजेशलाई निकाल्नुहोस्, हामीले देखेका छौँ भनेर खबर गरेको सुनाउँदै मल्लले अहिले विभिन्न बहाना निकालेर उसैमथि नै नैतिक प्रश्न खडा गर्ने अवस्था देखिएकोे मल्लको भनाइ थियो।
सैनिक प्रवक्ता सन्तोषबल्लभ पौडेलले संस्थानको गेटबाट निस्किएपछि शाही सम्पर्कविहीन भएको र अहिलेसम्म अवस्था थाहा हुन नसकेको बताए। उनले परिवार, प्रहरी र नेपाली सेनाको संयुक्त प्रयासमा खोजी भइरहेको पनि जानकारी दिए।
‘उनी गेटबाट निस्किएपछि सम्पर्कमा आएका छैनन्, कारण फेला पार्न सकिएको छैन’, प्रवक्ता पौडेलले भने। दुई महिनादेखि फेला नपर्नु विडम्बना भएको र उनको खोजीका लागि प्रधानसेनापति प्रभुराम शर्माबाट स्पष्ट निर्देशन आएको पनि उनले जानकारी दिए।
प्रवक्ता पौडेलले प्रहरीको केन्द्रीय अनुसन्धान व्युरो (सीआईबी) ले समेत घटनाको अनुसन्धान गरिरहेको र सीआईबीलाई अनुसन्धानमा सेनाको पूर्ण सहयोग रहेको पनि बताए। परिवारका सदस्यले उनको अवस्था पत्ता लगाएर न्याय दिन माग गर्दै आएको छ।
