बुटवल। बुटवलमा कार दुर्घटना हुँदा तीन जनाको मृत्यु भएको छ भने दुईजना गम्भीर घाइते भएका छन्। बुटवल तामनगर नजिक रहेको कोरियन टेक्निकल कलेज अगाडि ना २ ख ९७७२ नम्बरको ट्रकसँग लु ३ च ४४४२ नम्बरको कार ठोक्किँदा सो दुर्घटना भएको लुम्बिनी प्रदेश ट्राफिक प्रहरी कार्यालय बुटवलका प्रवक्ता मोहन बहादुर खाँणले बताए।
दुर्घटनामा परि मृत्यु हुनेमा बुटवल उपमहानगरपालिका–१३ का २८ वर्षीय सविन चौधरी, बुटवल १३ कै २७ वर्षीय गोविन्द चौधरी र बुटवल १२ का २६ वर्षीय नविन श्रेष्ठ रहेका छन्।
दुर्घटनामा गम्भीर घाइते भएका बुटवल–१२ का भागिरथ चौधरी र अनिश जिसीको बुटवलस्थित लुम्बिनी प्रादेशिक अस्पतालमा उपचार भइरहेको प्रहरीले जनाएको छ। ट्रक चालक फरार रहेको बताइएको छ। घटनाबारे थप अनुसन्धान भइरहेको प्रहरीले जनाएको छ।
