एजेन्सी।रुसले युक्रेन युद्धमा रासायनिक हतियार प्रयोग गर्न सक्ने सम्भावना दोहो¥याएको छ। युक्रेनको दक्षिण क्षेत्रका प्रमुख सहरमा आफ्ना सैनिकहरु अघि बढ्न नसकिरहेका बेला फेरि रासायनिक हतियार प्रयोग गर्न सकिने चेतावनी दिएको हो।
रुसका पूर्वराष्ट्रपति र हाल सुरक्षा परिषद्का उपप्रमुख रहेका डिमित्री मेडभेडेभले ‘शत्रु’ विरुद्ध रासायनिक हतियार प्रयोग गर्न सकिने बताएका छन्। उनले मस्कोमा रासायनिक हतियारतर्फ संकेत गर्दै ‘शत्रुमाथि’ निशाना बनाउन सकिने बताएका हुन्।
यस्तै रक्षामन्त्रीले पनि रासायनिक हतियार ‘तयारी अवस्था’ राखिएको र त्यो प्राथमिकतामा रहेको बताएका छन्। १२ दिनसम्म सार्वजनिक रुपमा नदेखिएका रुसी रक्षामन्त्री सर्गेइ शोइगुले शनिबार सैन्य जनरललाई सम्बोधन गरेर रासायनिक हतियार प्रयोग गर्न सकिने बताएका हुन्।
उनीहरुले शनिबार यस्तो टिप्पणी गरेका हुन्। त्यसपछि युक्रेनी राष्ट्रपति भोलोडिमिर जेलेन्स्कीले रुस पूरा विश्वका लागि प्रमुख चुनौती रहेको बताए। कतारमा भएको दोहा फोरमलाई भिडियो लिंकमार्फत सम्बोधन गर्ने क्रममा जेलेन्स्कीले रुसलाई लिएर विश्वलाई सचेत बनाएका हुन्।
‘रासायनिक हतियारको प्रयोग गरेर सबै ध्वस्त पार्ने चेतावनी दिँदै रुसले बार्गेनिङ गरिरहेको छ, यो जोखिम कुनै विशेष देशका लागि मात्रै नभएर पूरा ब्रह्माण्डका लागि हो’, जेलेन्स्कीले भनेका छन्।
रुसी राष्ट्रपति भ्लादिमिर पुटिनले युद्धको सुरुवातदेखि नै रासायनिक हतियार प्रयोगको चेतावनी दिँदै आएका छन्।पश्चिमा राष्ट्रका अधिकारीले भने रासायनिक हतियार प्रयोग गर्ने रुसको पछिल्लो चेतावनी युक्रेन युद्धमा आफ्नो विफलताबाट ध्यान भड्काएर किएभबाहेकका युक्रेनका प्रमुख सहरमा अघि बढ्ने नियतले गरिएको हुन सक्ने बताएका छन्।
