धन बहादुर भण्डारी
हुम्ला।नेपाल एयरलायन्सले हुम्ला लगायत कर्णालीका हिमाली जिल्लाका लागि उडान थप गरेको छ । यात्रुको चाप बृद्धि भएकाले उडान संख्या थप गरिएको हुम्ला शाखाका प्रमुख बलबहादुर सुनारले जानकारी दिएका छन् ।
नेपाल एयरलायन्स हुम्ला शाखाका प्रमुख सुनारका अनुसार हुम्लाका लागि सहुलियत उडान थप गरेर हप्तामा तीनवटा बनाइएको जानकारी दिए । यसअघि हप्तामा एउटा उडान गर्दै आएता पनि अब नेपाल एअरलायन्सले हुम्लाका लागि आइतबार, सोमबार र बिहीबार उडान गर्ने भएको छ । सिमकोटबाट नेपालगञ्जको भाडा नेपाल एअरलायन्समा ६ हजार ९१० रुपैयाँ छ ।
निजी स्तरका तारा र सीता एयरले ६ हजार ३० र समिट एयरले ६ हजार १३० रुपैयाँ लिने गरेका छन् । जुम्ला र मुगुका लागि पनि हप्तामा तीनवटा उडान कायम गरिएको उनले बताएका छन । त्यसैगरि लामो समय सेवा बन्द रहेको डोल्पाका लागि पनि उडान सुचारु गर्ने तयारी भइरहेको उनले जानकारी दिए । नेपालगञ्जमा एउटा जहाज नाईट स्टे रहने गरी व्यवस्था गरेको कारण कर्णाली र सुदूरपश्चिमका पहाडी तथा हिमाली जिल्लामा उडान भर्न सहज भएको हो । सुदूरपश्चिमका बाजुरा, बझाङ लगायतका जिल्लामा पनि नेपाल एअरलायन्सले उडान गरिरहेको छ ।
