एजेन्सी।रुसले युक्रेन युद्धको जिम्मेवारीमा रहेका आफ्ना सैनिकको नेतृत्व परिवर्तन गरेको पश्चिमा अधिकारीले बताएका छन्। रुसले युक्रेन आक्रमणको नेतृत्व गरिरहेका सैनिकहरुको जिम्मेवारी हेरफेर गरेको पश्चिमा अधिकारीलाई उद्धृत गर्दै बिबिसीले जनाएको छ।
रुसले सिरिया युद्धमा लामो अनुभव लिएका जनरललाई युक्रेन युद्धमा रहेका आफ्ना सैनिकको कमाण्डरको ठाउँमा पठाएको अधिकारीले बताएका हुन्।नाम उल्लेख नगर्ने शर्तमा बिबिसीका गोर्डन कोरेरासँग कुराकानी गर्दै स्रोतले रुसको दक्षिणी सैन्य डिस्ट्रिक्टका जनरल एलेक्सान्डर डिभोर्निकोभलाई युक्रेन युद्धको नेतृत्व दिएको बताएको हो।
‘यी कमाण्डरले सिरिया युद्धमा रुसी अभियानको लामो अनुभव संगालेका छन्, सोही कारण यिनको नेतृत्वमा युक्रेनमा रुसी सैनिकको व्यवस्थापन र कमाण्डरप्रतिको बफादारिता सुधार हुने सक्नेछ’, उनले भने।
युक्रेनमा रहेका रुसी सैनिकबीच सहकार्य र उत्साहको कमी देखिएको भन्ने खबर आइरहेका बेला त्यसलाई सुधार गर्न रुसले सैन्य नेतृत्व परिवर्तन गरेको हो।
रुसले युक्रेनमा आक्रमण थालेको ४५ दिन भइसकेको छ। तर उसले सुरुमा लक्ष्य गरेअनुसार राजधानी किएभसहितका प्रमुख सहर कब्जा गर्न सकेको छैन। अहिले रुसले आफ्नो आक्रमण युक्रेनको पूर्वी क्षेत्र डोन्बासमा केन्द्रित गरेको छ।
तुलनात्मक रुपमा आकारमा सानो र सैन्य क्षमताका हिसाबले पनि कमजोर मानिएको युक्रेनी सैनिकले भने गएको फेब्रुअरी २४ मा रुसले आक्रमण सुरु गरेदेखि नै प्रभावकारी रक्षात्मक प्रदर्शन गरिरहेको छ।
