ओखलढुङ्गा।ओखलढुङ्गामा जिप दुर्घटना हुँदा मृत्यु भएका दुईजना प्रहरीको सनाखत भएको छ। दुर्घटनामा परी प्रहरी हवल्दार सोलुखुम्बु घर भएका भूपेन्द्र कार्की र प्रहरी जवान झापा घर भएका मनिक राजवंशीको मृत्यु भएको जिल्ला प्रहरी कार्यालय ओखलढुङ्गाले जनाएको छ। अन्य ७ जना घाइते भएका छन्।
तीमध्ये एकजनाको स्थानीय अस्पतालमा उपचार भइरहेको छ भने अन्य ६ जना प्रहरीलाई काठमाडौंस्थित प्रहरी अस्पतालमा ल्याइएको छ। दुर्घटनामा पर्नेहरू ८ जना नेपाल प्रहरी र १ जना सर्वसाधारण हुन्।
दुर्घटनामा परेको जिप नम्बर अझै खुलेको छैन। घटनाबारे थप विवरण आउन बाँकी रहेको प्रहरीले जनाएको छ। सोलुखुम्बुबाट छुटेको जिप आज बिहान साढे ९ बजे ओखलढुंगाको हर्कपुरमा दुर्घटनामा परेको थियो।
