सुर्खेत। नेपालीहरुको महान चाड शुभ दीपावली शुरु भएसँगै सुर्खेत बजारमा तिहारको सामान किन्नेको भिड बढेको छ। तिहार लागेसँगै सुर्खेतका मुख्य व्यापारिक क्षेत्रहरुमा सामान खरिद गर्ने उपभोक्ताहरुको भिड देखिएको छ।
सुर्खेतको वीरेन्द्रचोक लगायतका क्षेत्रमा सर्वासाधारणको चाप उल्लेख्य छ। सुर्खेतका भित्री बजारका गल्लीमा समेत खाने मसलाका आकर्षक प्याकेटहरु सजाइएको छ।
मखमली र सयपत्री फूलले कर्णाली प्रदेशको राजधानी सुर्खेत बजार ढाकिएका देख्न सकिन्छ। बजार घुम्न जानेलाईसमेत तिहारको रमझमले आकर्षित बनाएको देखिन्छ।
तिहारमा प्रयोग हुने सामानहरुमध्ये झिलीमिली बत्ती, तामा र पित्तलका भाँडा, दियो, प्लास्टिकका मालाहरु, सप्तरंगी टीकालगायतका सामग्रीहरु यतिबेला बजारमा जहाँतहीँ बेच्न राखिएका छन्। विशेष गरी तिहारमा चाहिने सामान किनमेल गर्न मानिसहरु आउने भएकाले पनि त्यस क्षेत्रमा बढी भिड भएको हो।
लक्ष्मी पूजाका लागि चाहिने माटाको पाला, बत्ती, सप्तरंगी टीका, कपडा, ढाकाटोपी र अन्य सामग्रीहरु किनमेल गर्नेको चहलपहल बजारमा जताततै देख्न सकिन्छ। त्यस्तै, भाइटीकाका लागि चाहिने सगुनहरुको पनि किनमेल बढेको छ। यी क्षेत्र लगायत उपत्यकाका अन्य क्षेत्रमा पनि तिहारमा चाहिने सामान किन्नेहरुको चहलपहल शुरु भएको पाइन्छ। आजबाट विधिवत रुपमा यमपञ्चक शुरु भएको छ। आज धनतेरस पर्व पनि मनाइँदै छ। सुन, चाँदीका सामग्रीहरुको पूजा गरेर धनतेरस मनाइने गरिन्छ।
आज बेलुका यमदीपदान शुरु गर्ने र भोलिबाट क्रमशः काग तिहार, कुकुर तिहार, लक्ष्मीपूजा, गोरु तिहार र भाई टीका मनाउने गरिन्छ।
