सुर्खेत । कर्णालीका मुख्यमन्त्री यामलाल कँडेलले एक वर्षको अवधिमा ९५ किलोमिटर सडक कालोपत्रे भएको विवरण सार्वजनिक गरेका छन् । ०८० चैत्र २७ गते मुख्यमन्त्रीमा नियुक्त भएका कँडेलले बिहीबार पत्रकार सम्मेलन गर्दै एक वर्षे कार्यकालको समीक्षा गरे । तीन हजार दुई सय शब्दको प्रगति विवरण सार्वजनिक गर्दै कँडेलले ९५ किलोमिटर सडक कालोपत्रे भएको बताएका हुन् ।
यस्तै २०५ किलोमिटर सडक ग्राभेल र ५२५ किलोमिटर नयाँ सडक खनिएको छ । कँडेलले एक वर्षको अवधिमा २३ वटा पक्की पुल तथा ४२ वटा झोलुङ्गे पुल निर्माण सम्पन्न भएको बताए । यस्तै जनता आवास र विपन्नका घर गरी करिब १ हजार ४८ आवास इकाई निर्माण भएको छ ।
ग्रामीण सडक सञ्जाल सुधार आयोजना तर्फका दशरथपुर–जितेजुवा–ढाँडखेत–मटेला–धरमपोखरा सडक सुर्खेत, मोर्क–चंखिला–बडावन–सानाखोला सडक जाजरकोट र चैरजहारी–नार्जी–खोलागाउँ–चौफा–बैरागीठाँटी मुसीकोट–सल्ले सडक रुकुम पश्चिम गरी ३ वटा सडकहरूको कालोपत्रे तथा ती सडकखण्डमा पर्ने पुलहरूको निर्माण कार्यको हाल तीव्र गतिमा भइरहेको कुरा प्रगति विवरणमा समेटेका छन् । कँडेलले यसअघिदेखि नै भए/गरेका सडक पुर्वाधारलाई प्रगति विवरणमा राखे पनि उनी आएदेखि देखिने गरी सडकमा काम भएको वीरेन्द्रनगरस्थित प्रादेशिक रङ्गशाला आसपासका सडक हुन् । उनकै जोडमा राष्ट्रिय खेलकुद प्रतियोगितालाई लक्षित गरी रङ्गशाला वरिपरि, सुर्खेत विमानस्थल जोड्ने लगायतका सडक कालोपत्रे गर्ने काम छोटो समयको अन्तरालमा भएको हो ।
