काठमाडौं। नेपाली कांग्रेस संस्थापन इतरका नेताहरूले १४औं महाधिवेशनमा आफ्नो समूहबाट साझा उम्मेदवार चयनका लागि सहमतिनजिक पुगेको दाबी गरेका छन्। महाधिवेशन सुरु हुनु तीन दिनअघि मंगलबार पूर्वमहामन्त्री प्रकाशमान सिंहको निवास चाक्सीबारीमा बसेको इतर पक्षको बैठक साझा उम्मेदवार तय गर्न सहमतिनजिक पुगेको दाबी नेताहरूले गरेका हुन्।
नेता रामचन्द्र पौडेललाई १४औं महाधिवेशनमा पनि सभापतिको प्रत्याशीका रुपमा प्रस्तुत गर्न अन्य आकांक्षी लचक देखिएको निकट स्रोतको दाबी छ। तर बुधबार बिहान केन्द्रीय सदस्य, जिल्ला सभापति,निवर्तमान जिल्ला सभापति, प्रदेश समितिका सभापति र उम्मेदवारका आकांक्षीसहितका नेताहरूको धारणा सुनेपछि साँझ साझा उम्मेदवार घोषणा गर्ने नेताहरूले बताएका छन्।
बिहान ९ बजे बत्तीसपुतलीस्थित अनुपम फुड ल्यान्डमा पौडेलले आफ्नो समूह निकट जिल्ला नेताहरूको धारणा सुन्नेछन्। सभापतिका अन्य तीन आकांक्षी शशांक कोइराला,प्रकाशमान सिंह र शेखर कोइराला भने सो भेलामा सहभागी हुनेछैनन्।
