काठमाडौं। नेकपा माओवादी केन्द्रको संसदीय दलको बैठक सकिएको छ। दलको कार्यालय सिंहदरबारमा बसेको बैठकले विभिन्न निर्णय गर्दै सकिएको हो। अध्यक्ष पुष्पकमल दाहाल ‘प्रचण्ड’को सचिवालयका अनुसार बैठकले राष्ट्रियसभा दलका प्रमुख सचेतकमा गोपी अछामी, सचेतकमा गंगा बेलबासे र सचिवमा रामनारायण बिडारी चयन गरेको छ।
त्यस्तै, २१ सदस्यीय संसदीय बोर्डको गठन गरेको छ। बैठकमा पार्टी अध्यक्ष प्रचण्डले सदस्यहरूले उठाएका विषयको जवाफ दिएका थिए। उनले हिउँदे अधिवेशनलाई प्रभावकारी बनाउन सांसदहरुलाई निर्देशन दिएका छन्। बैठकले सर्वदलीय बैठक बस्ने र संसदको गतिरोध हटाउन आवश्यक पहल गरिने निर्णय पनि गरेको छ।
संसद बैठक बस्नुअघि माओवादीले दलको बैठक बोलाएको हो। संघीय संसद्को हिउँदे अधिवेशन आजदेखि सुरु हुँदैछ। संसद्का दुबै सदनको पहिलो बैठक मंगलबार दिउँसो २ बजे बस्नेछ। पहिलो बैठकमा दुबै सदनमा अधिवेशन आह्वानको पत्रबारे जानकारी गराइने छ।@lokpati
