सर्लाही। जाडोबाट बच्नको लागि घरमा पराल ओढेर सुतेका दिदीबहिनीको जलेर मृत्यु भएको छ। जिल्लाको कबिलासी नगरपालिका– ७ निवासी जोगी महरा चमारकी ३ वर्षीया छोरी सुगन्धी महरा र ८ वर्षीया छोरी लक्ष्मी महराको जलेर मृत्यु भएको हो।
जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक माधव प्रसाद बुढाथोकीले चमारकी अर्की छोरी ५ वर्षीया सुधा महरा घाइते भएको जानकारी दिए। बुधबार राति दिदीबहिनी आफ्नै फुसको घरमा जाडोबाट बच्न पराल ओढेर सुतेका थिए। सोही क्रममा घरमा आगलागी हुँदा दुबै जलेर घाइते भएको प्रहरी नायब उपरीक्षक बुढाथोकी बताए।
आगलागिबाट गम्भीर घाइते दुबैलाई तत्काल उपचारको लागि मलंगवा अस्पतालमा लगिएकोमा एकजना त्यहाँ र अर्को एकजनाको काठमाडौँ लैजाने क्रममा मृत्यु भएको हो। राति करिब सवा ९ बजेको समयमा फुसको घरमा विद्युत सट भएर आगलागी भएको बुढाथोकीले बताए। मृतक बालिकाका शवलाई पोष्टमार्टमको लागि मलंगवा अस्पतालमा राखिएको तथा घाइते सुधा उपचारपछि घर फर्केकी छिन्।आगलागीको घटनाबारेमा थप अनुसन्धान भइरहेको जिल्ला प्रहरी कार्यालय सर्लाहीले जनाएको छ।
