काठमाडौं : देशका विभिन्न ठाउँमा गएराति भएका सवारी दुर्घटनामा ४ जनाको मृत्यु भएको छ। ललितपुरको कुपण्डोलमा गएराति मोटरसाइकल बिजुलीको पोलमा ठोक्किँदा एक जनाको मृत्यु भएको छ।
एक जना भने घाइते भएका छन् । बा ९५ प ५३३४ नम्बरको मोटरसाइकल गएराती सवा एक बजे अनियन्त्रित भएर बिजुलीको पोलमा ठोकिएको थियो। दुर्घटनामा घाइते भएका मोटरसाइकलमा सवार मंगलबजार बस्ने ललितपुरकै गोदावरी नगरपालिका-९ छम्पीका ३१ वर्षीय राजु तामाङको उपचारको क्रममा आज बिहान तीन बजे पाटन अस्पतालमा मृत्यु भएको हो। मोटरसाइकल चालकको भने राष्ट्रिय ट्रमा सेन्टर काठमाडौंमा उपचार भइरहेको छ।
यस्तै बाग्लुङको ढोरपाटन नगरपालिका १ खप्तडीवाङमा गएराति मोटरसाइकल पल्टिदा चालक निसिखोला गाउँपालिका ७ का ३३ वर्षीय लिला तामाङको मृत्यु भएको छ। दुर्घटनामा घाइते मोटरसाइकलमा सवार सोही ठाउँका ३८ वर्षीय सागर तामाङको सोही प्राथमिक केन्द्रमा उपचार भइरहेको छ।
पर्वतको विहादी गाउँपालिका ६ बिसुन डाँडामा ट्याक्टर पल्टिँदा च्यापिएर चालक बिहादी गाउँपालिका ५ का ३० वर्षीय मुक्ति पराजुलीको मृत्यु भएको प्रहरीले जनाएको छ।
यसैबीच सिन्धुलीको कमलामाई नगरपालिका ६ राममाडीमा ट्याक्टर र मोटरसाइकल आपसमा ठोक्किँदा मोटरसाइकल चालक कमलामाई ६ का २७ वर्षीय शिव कुमार खत्रीको मृत्यु भएको छ । ज १ त ६३८७ नम्बरको ट्याक्टर र प्रदेश २–०३–०२१ प ७६०८ नम्बरको मोटरसाइकल आपसमा ठोकिएका थिए।
