काठमाडौँ।प्रतिनिधिसभाको बैठक बुधबार दिउँसो बस्दैछ। दिउँसो १ बजेका लागि बैठक बोलाइएको हो।बैठकको कार्यसूची तय गर्नका लागि सभामुख अग्निप्रसाद सापकोटाले बिहान साढे ११ बजे कार्यव्यवस्था परामर्श समितिको बैठक बोलाएका छन्।
बुधबारको बैठकमा एमसिसी पेश हुने सम्भावना रहेको छ। तर सार्वजनिक भएको सम्भावित कार्यसूचीमा भने एमसिसी छैन। कार्यव्यवस्था परामर्श समितिको बैठकपछि थप यकिन हुनेछ।
एमसिसीलाई लिएर धेरैको चासो र चिन्ता रहेको छ। प्रधानमन्त्री शेरबहादुर देउवाको पार्टी नेपाली कांग्रेसको मंगलबार बसेको संसदीय दलको बैठकले बुधबार नै एमसिसी पेश गर्नुपर्ने निर्णय गरेको थियो।
यस्तै मंगलबार प्रधानमन्त्री देउवा, माओवादी अध्यक्ष प्रचण्ड र नेकपा (एकीकृत समाजवादी) का अध्यक्ष माधवकुमार नेपालबीच भएको वार्तामा एमसिसी संसदमा पेश गर्ने सहमति भएको दाबी गरिन्छ। तर एमसिसी संसदमा पेशमात्रै हुने वा पारित पनि गर्ने भन्नेमा भने यकिन हुन सकेको छैन।
