काठमाडौँ।अस्ट्रेलियामा जारी टी–२० विश्वकपको सेमिफाइनल समीकरण पूरा भएको छ। आइतबार समूह २ का खेल सकिएसँगै सेमिफाइनल पुग्ने सबै चार टिमको टुंगो लागेको हो।
समूह १ बाट न्युजिल्यान्ड विजेता र इंग्ल्यान्ड उपविजेताका रुपमा सेमिफाइनलमा पुग्दा समूह २ बाट भारत समूह विजेता र पाकिस्तान समूह उपविजेताका रुपमा फाइनलमा पुग्न सफल भए।
अब फाइनल प्रवेशका लागि बुधबार न्युजिल्यान्डले पाकिस्तानको सामना गर्दा बिहीबार भारत र इंग्ल्यान्ड प्रतिस्पर्धा गर्नेछन्। विजेता टिमबीच १३ नोभेम्बर मा उपाधिका लागि प्रतिस्पर्धा हुनेछ।
जिम्बावेमाथि भारतको सहज जित
आइतबार भएको समूहको अन्तिम खेलमा भारतले जिम्बाब्वेलाई ७१ रनको फराकिलो अन्तरले पराजित गर्दै समूह विजेता बन्यो।
पहिले ब्याटिङ गरेको भारतले निर्धारित २० ओभरमा १ सय ८६ रनको उच्च स्कोर बनाएको थियो। जवाफमा जिम्बाब्वे १ सय १५ रनमा समेटियो। जिम्बाब्वेका लागि रायन बुर्लले ३५ रन बनाउनु सर्वाधिक रह्यो। त्यस्तै सिकन्दर राजाले ३४ रन बनाए।
त्यसअघि मेलवर्नमा पहिले ब्याटिङ गरेको भारतले सूर्यकुमार यादवको विष्फोटक इनिङमा सानदार लक्ष्य दियो। यादवले २५ बलमा ६१ रन बनाएका थिए। त्यस्तै केएल राहुलले ५१ रन बनाएका थिए।
भारतले प्रतियोगितामा ४ जितसहित ८ अंक बनाउँदा पाकिस्तान भने भाग्यमानी रह्यो। दक्षिण अफ्रिका नेदरल्यान्डसँग पराजित हुँदा पाकिस्तानले बंगलादेशलाई हराएर सेमिफाइनलमा स्थान बनाउन सफल रह्यो।
