काठमाडौँ । एसिसी प्रिमियर कप क्रिकेटअन्तर्गत टियू मैदानमा जारी नेपाल र युएईबीचको फाइनल खेल पुन:सुरु भएको छ।१६ ओभरको समाप्तीमा युएई ६० रन जोडेर ५ विकेट गुमाएको अवस्थामा वर्षा सुरु भएसँगै स्थगित भएको खेल पुन:सुरु गरिएको हो।
टस जितेर पहिले फिल्डीङ रोजेको नेपालले युएईविरुद्ध कसिलो बलिङ गर्दै गतिलो सुरुवात गरेको थियो। युएईका लागि असिफ खान १५ तथा बसिल हमेद ६ रनमा नटआउट रहेका छन्।
युएईका लागि कुनैपनि ब्याटर क्रिजमा जम्न सकिरहेका छैनन्। उसका लागि कप्तान मुहम्मद वासिमले ११ रन बनाउँदा आर्यान लाक्राले १३ रन बनाए।
त्यस्तै, वृत्या अर्विन्द ८ रनमा आउट हुँदा रमिच सहाजेद १ रनमा पेभिलियन फर्किएका थिए। त्यस्तै रोहन मुस्तफा २ रनमा आउट भए।
नेपालका लागि करण केसीले २ विकेट लिंदा सोमपाल कामी, ललित राजवंशी र सन्दीप लामिछानेले समान १-१ विकेट लिएका छन्।
