काठमाडौँ ।अहिलेको सत्ता गठबन्धन राष्ट्रियसभा चुनावसम्मका लागि मात्रै रहेको प्रधानमन्त्री शेरबहादुर देउवाले बताएका छन् ।प्रधानमन्त्री निवास बालुवाटारमा सोमबार बिहान सञ्चारकर्मीसँगको छलफलको क्रममा देउवाले राष्ट्रियसभा चुनावपछि गठबन्धन के हुने भन्नेबारे छलफल नभएको बताएका हुन् ।
प्रधानमन्त्री देउवाले भनेका छन्, ‘अहिलेको गठबन्धन राष्ट्रियसभा चुनावसम्म मात्रै हो । त्यसपछि गठबन्धन कायम गर्ने–नगर्ने भनेर छलफल भएको छैन।’आउँदो माघ १२ गते राष्ट्रियसभाको निर्वाचन गर्ने कार्यातालिका निर्वाचन आयोगले तय गरेको छ । राष्ट्रियसभाका २० सदस्यको पदावधी आउँदो फागुन २० गते सकिँदैछ । २० सदस्यमध्ये एकजना राष्ट्रपतिबाट मनोनित हुन् भने १९ पदका लागि माघ १२ मा चुनाव हुनेछ ।
यसैबीच देउवाले आफू फेरि एकपटक पार्टीको विधान बमोजिम सभापति बन्न चाहेको पनि बताएका छन् । सभापतिमा निर्वाचित भएमा राम्रो काम गर्ने दाबी उनको छ ।देउवाले भनेका छन्, ‘पार्टीको विधानबमोजिम एकपटक सभापति बन्न चाहेको छु । यो अन्तिमपटक हो। फेरि सभापति बनेमा अझै राम्रो गर्न सक्छु।’
