सुर्खेत।मध्यपश्चिम विश्वविद्यालयको दोस्रो दीक्षान्त समारोह सम्पन्न भएको छ । दोस्रो दीक्षान्त समारोहबाट पाँच सय १९ विद्यार्थीहरु दीक्षित भएका छन् । विश्वविद्यालयको केन्द्रिय कार्यालय वीरेन्द्रनगरमा मंगलबार आयोजना गरिएको समारोहमा दीक्षित हुन योग्य दुई हजार ८९ विद्यार्थी मध्य पाँच सय १९ विद्यार्थीहरु दीक्षित भएका हुन् ।
विश्वविद्यालयका उत्कृष्ट नौ जना विद्यार्थीले कुलपति र २० जना विद्यार्थीले उपकुलपति पदक प्राप्त गरेका छन् । शिक्षा विज्ञान तथा प्रविधि मन्त्री देवेन्द्र पौडेलले शिक्षा संकायका कमला ज्ञवाली, विष्णा मगर र इसक घरे, मानविकि तथा समाजशास्त्र संकायका एश्वर्या कुमारी विष्ट, काव्या रिजाल र रदिप महर्जनलाई कुलपति पदक प्रदान गरे ।
यस्तै व्यवस्थापन संकायतर्फ यामकुमारी आचार्य, लक्ष्मी लामिछाने र अर्जुन कुमार चौधरीले पनि कुलपति पदक प्राप्त गरे । सुर्खेत उद्योग वाणिज्य संघ पदक पाँच जना विद्यार्थीहश्रले प्राप्त गरेका हुन् ।
विश्वविद्यालयका उपकुलपति प्रा.डा नन्द बहादुर सिंहका अनुसार शिक्षा संकायतर्फ ८५ विद्यार्थी, इन्जिनियरिङ्गतर्फ १४५ विद्यार्थी, मानविकितर्फ १५२ विद्यार्थी, व्यवस्थापनतर्फ १२२ विद्यार्थी, विज्ञान संकायतर्फ १५ जना र विद्यावारिधि (पिएचडी)तर्फ एक जना विद्यार्थी दीक्षित भएका छन् ।कार्यक्रममा सन् २०१४ का नोवेल शान्ति पुरस्कार विजेता भारतका कैलाश सत्यार्थी, कर्णाली प्रदेश मुख्यमन्त्री जीवनबहादुर शाही, मन्त्रीहरुलगायतको सहभागिता रहेको थियो ।
