सुर्खेत। डोटीमा आज बिहान बस दुर्घटना भएको छ। दुर्घटनामा परी १२ जना घाइते भएका छन्।घाइतेमध्ये पाँच जनाको अवस्था जटिल रहेकाले उपचारका लागि जिल्ला बाहिर पठाउने तयारी भएको दिपायल इलाका प्रहरी कार्यालयका प्रमुख रुपसिंह थापाले जानकारी दिए।
दुर्घटनामा परी एक बालक बेपत्ता भएका छन्। अछामको चौरपाटी गाउँपालिका-६ का सुरेन्द्र शाहीका १८ महिने छोरा बेपत्ता भएकाे र उनको खोजी भइरहेको प्रहरीले जनाएको छ।कैलालीबाट अछामका लागि छुटेको ना ५ ख ९६६३ नम्बरको रात्रिबस आज बिहान ५ बजे शिखर नगरपालिका-१ गेरुपानी सडकखण्डमा दुर्घटनामा परेको हाे।
अन्य घाइतेको पिपल्लास्थित शैलेश्वरी अस्पतालमा उपचार भइरहेको छ। तीव्रगतिमा रहेका बसका चालक निदाएपछि दुर्घटना भएको हुनसक्ने प्रहरीको प्रारम्भिक अनुमान छ।बस सडकबाट २० मिटर तल सेती नदीको किनारमा खसेको छ। बस चालक फरार रहेकाले उनको खोजी भइरहेको प्रहरीले जानकारी दिएको छ।
